*मलकापूर, प्रतिनिधी:* मलकापूर शहरातील वीर जगदेवराव सहकारी सूतगिरणी परिसरात काल रात्री अज्ञात चोरट्यांनी धाडसी घरफोडी केली. भाऊराव जानकीराम तायडे यांच्या बंद घराचे कुलूप तोडून चोरट्यांनी रोख रक्कमेसह घरातील साहित्य लंपास केले. या घटनेमुळे संपूर्ण परिसरात भीतीचे वातावरण पसरले आहे.
*नेमकं काय घडलं?*
प्राप्त माहितीनुसार, भाऊराव जानकीराम तायडे हे गेल्या अनेक वर्षांपासून कुटुंबासह सुतगिरणी आवारात वास्तव्यास आहेत. सुतगिरणी बंद पडल्याने हातावर पोट असणारे तायडे कुटुंब मोलमजुरी व शेती करून कसाबसा उदरनिर्वाह चालवते. काल रात्री घरमालक कामानिमित्त बाहेरगावी गेले असता, अंधाऱ्या रात्रीची संधी साधून चोरट्यांनी त्यांच्या घराचे कुलूप तोडले. घरातून अंदाजे 5 ते 7 हजार रुपये रोख व 3 ते 5 हजारांचे इतर साहित्य असा एकूण 10 हजारांपर्यंतचा ऐवज चोरून नेला. सकाळी शेजाऱ्यांच्या लक्षात हा प्रकार आल्याने एकच खळबळ उडाली.
*सुतगिरणी परिसरात चिंतेचे वातावरण:*
स्थानिक नागरिकांनी सांगितले की, गेल्या काही वर्षांपासून सुतगिरणी बंद असल्याने परिसरात शुकशुकाट आहे. यापूर्वीही सुतगिरणी आवारात घरफोडीच्या घटना घडल्या आहेत. "आम्ही मोलमजुरी करून कसाबसा संसार चालवतो, अशा घटनांमुळे जगणं कठीण झालंय," अशी व्यथा पीडित भाऊराव तायडे यांनी व्यक्त केली आहे.
*संपूर्ण तालुक्यात शेतकऱ्यांचे साहित्यही असुरक्षित:*
मलकापूर तालुक्यात सध्या शेतातून विद्युत तारा, केबल, विद्युत मोटारी, ठिबक सिंचनाचे पाईप रातोरात गायब होण्याच्या घटनांमध्ये वाढ झाली आहे. बळीराजा आधीच निसर्गाच्या लहरीपणाने मेटाकुटीला आला असताना, अशा चोरीच्या घटनांमुळे त्यांच्यासमोर दुहेरी संकट उभे राहिले आहे.
*नागरिकांची मागणी:*
वारंवार होणाऱ्या या घटनांमुळे परिसरात भीतीचे वातावरण आहे.
*नागरिकांच्या प्रमुख मागण्या:*
1. सुतगिरणी व ग्रामीण भागात *रात्रीची गस्त वाढवावी*.
2. चोरीच्या घटनांचा छडा लावण्यासाठी *विशेष तपास* करावा.
3. भाऊराव तायडे यांच्या कुटुंबाला *तात्काळ मदत* मिळावी.
4. शेतातील साहित्य चोरी रोखण्यासाठी *ग्राम सुरक्षा दल* सक्रिय करावे.
अशा अपेक्षा नागरिक व्यक्त करत आहेत.
*- सुनिल बाबुराव संबारे पत्रकार...*✍️
Post a Comment
0 Comments